Resolusi 2017 (Contoh Tulisan Buat Kelas 9)

Resolusi… hmmm makhluk apaan dah ntu. Aye sering denger resolusi disebut kalo taon baru. Katenye taon baru kudu bikin resolusi. Kalo udah bikin trus titipin di warung. Mayan bisa dapet duit.

Ehhh itu sik risol isi. Kalo kate babang gugel, resolusi ntu kepengenan. Jadi taon ini kite pengen apaan gitu. Pengen apaan aja seterah tapi pengennya kudu pengen ame nyang baek-baek. Jangan pengen nyang jelek. Orang baek pan disayang pacar.

(nyeruput kupi, nyomot risol isi)

Ngomong soal kepengenan, aye juga punye. Kepengenan aye kagak jauh-jauh dah dari babang Pale alias Palentino Rossi. Ampir tiap taon aye ame babang Pale ngider-ngider ke Sepang, Malaysia sono. Aye bosen. Taon maren aye bilang ke babang Pale.. “jangan ngider di mari mulu nape bang, bosen sepang lagi sepang lagi”.

Babang Pale nyengir… katenye.. “emang maunye ngider di mane beib?” Aye jawab sambil benahin knalpot nyang abis diacak-acak babang Pale.. “nyang deketan dikit bang.. ntu ke Itali. Pan aye pengen makan pitsa di warung babang Pale”, kate aye sambil kedip-kedip kelilipan.

Babang Pale bengong “bukan buat nonton aye balapan beib?”. Aye ngakak dan langsung jawab, “kagak ah.. abis babang kalah mulu”. Tuingggg… knalpot melayang dah. ngider di sepang (dok.yayat) ngider di sepang (dok.yayat) (ngunyah risol isi) Kepengenan aye nyang laen ntu punya motor kayak babang Pale.

Motor babang Pale keren, cakep dah. Gede.. rodanye dua (kalo roda tiga ntu namanye becak). Kalo ngacir wwuuzzzz laler juga kalah cepet. Babang Pale anter aye ke warung mpok Keti Peri pake ntu motor. Beuhhhh orang di warung pade ngeliatin. Ngeliatin aye nyang kayak semut di boncengan motor babang Pale, imut sih. Aye pernah minta beliin motor sama babang Pale, tapi babang Pale nyuruh sabar.

Duitnye belon ade. Pan babang Pale kalah mulu noh jadi gajinye belon naek. Sabar ye beib, ntar kalo babang naek gaji, babang beliin motor, katenye. Aye jawab sambil mesem, “aye doain ye bang, biar markes kesrimpet botol oli jadi babang menang”. (nyeruput risol isi, nyomot kupi… eeehhh kebalik)

Sebenernye, salah aye juga sih nyang ngabisin duit babang Pale. Aye demen banget jajan. Jajan ape aje deh. Jajan kue rangi, mi lidi, krupuk jengkol, cilok.. semuanye dah. Jadinye duit blanje abis buat aye jajan. Perkare kedoyanan aye ame jajan.. aye punya kepengenan jadinye. babang pale (dok.gigi soldano) babang pale (dok.gigi soldano)

Aye pengen bikin warung. Warung ntu isinye macem-macem. Mau cari ape.. semua ade di warung aye. Kue rangi.. ade, krupuk jengkol ade, cilok, cimol, tahu bulet.. ade semue. Kalo aye punya warung kayak gini kan aye jadi gampang jajan.

Ngelongok jendele aje langsung dah ade warung. Babang Pale kagak bakal repot nganterin aye jajan pake motornye nyang gedenye alaihim gambreng. Tapi ente kagak boleh ye jajan di warung aye, pan ntu warung punya aye, jadi cuman aye nyang boleh jajan di sono. Pelit? Bodo.. emang aye pikirin. “Beeiibbb… botol oli mane? Babang pengen minum!”

Yaelah babang Pale kagak demen amat liat aye sante kayak di pante sambil makan sate.

Selengkapnya : http://www.kompasiana.com/yayat/resolusi-2017-aye-pengen-ngider-ke-itali-ame-babang-pale_587f0f911197730807112bd9